Աշխարհ ամենայն
* * *
Աշխարհ ամենայն՝
Առ իս նայեցեալ,
Ախտակից լերուք։
Բանամ ըզշրթունս,
Բարբառիմ լեզուաւս,
Բողոքեմ զանձնէս։
Գո՛ղ եղէ մեղաց
Գըտող կորըստեան,
Գուբ ինձ փորեցի։
Դաւեցի զանձն իմ,
Դաւաճանեցի՝
Դարան գործեցի։
Երբեմն էի լոյս
Եւ այժմ եմ խաւար,
Եւ ստուեր մահու:
Զիա՞րդ պատմեցից
Զթիւ մեղաց իմոց,
Զի բազում են յոյժ։
Էրկինք և երկիր՝
Եկայք ողբացէ՛ք
Եղկելի զանձն իմ։
Ընտրեցի ըզչարն,
Ընկալայ կամաւ
Ըզհոյլըս մեղաց։
Քաւիչ յանցանաց,
Քաւեա՝ զօրհնաբանս,
Քեզ երգել զփառս։
Թաթաւիմ տըղմով,
Թաւալիմ ի մեղս,
Թոթափիլ չկարեմ։
ժանտ ախտիւ լցեալ,
ժահահոտ եղէ
Ժամանակս բազումս։
Ի բաց մեկնեցայ
Ի սուրբ խորհրդոց,
Ի բարեաց գործոց։
Լաւ վարկաւ անձն իմ
Լուսոյն հեռանալ,
Լինել ընդ խաւար։
Խորհուրդըք չարին
Խաբեն ըզհոգիս,
Խորասոյզ առնեն։
Ծածկեն անդընդօք,
Ծիծաղին գլորմամբս,
Ծանակ զիս առնեն։
Կամաւ կորացայ,
Կարկամեալ անձամբ,
Կանգնիլ ոչ կարեմ։
Հուր մեղաց կիզող,
Հրդեհեաց որ յիս,
Հոգևոր բարիս։
Ձաղկեցայ մեղօք,
Ձաղեցին տեսողքն,
Ձանձրացաւ հոգիս։
Ղեղի դառնութեան
Ղօղեալ է սիրտ իմ,
Ղամպար իմ շիջաւ:
Ճաշակմամբ մեղաց
Ճաշեցի ըզմահ.
Ճոխս աղքատացայ։
Մեռեալ եմ հոգովս,
Մոլորեալ՝ մտօքս,
Միա՛յն կամ մարմնովս։
Յորոգայթ մահու
Յորսողին անկայ,
Յաղթեցայ յախտից։
Նետից թշնամւոյն
Նշաւակ եղէ.
Նոր միշտ խոցոտիմ։
Շուրջ պատեալ զինև,
Շունք բազում եղեն.
Շաղախին արեամբս։
Որս եղէ չարին,
Ուռկանաւ մեղաց
Որսացաւ անձն իմ։
Չարաչար վշտօք
Չարչարի անձն իմ,
Չունիմ դադարումն։
Պարտապան գըտայ
Պարտուց յանցանաց.
Պարտեալս ի մեղաց։
Ջանամ զըղջանալ,
Ջերանիմ դարձեալ,
Ջեռնում հրով մեղաց։
Ռաբբի կոչեցայ,
Ռակայ անուանիմ
Ռամկական վարուքս։
Սիրով ցանկութեան,
Սաստիկ բարկութեամբ,
Սիրտ իմ խոցեալ է:
Վիրօք յանցանաց,
Վշտանայ հոգիս,
Վարանեալ շրջիմ։
Տիրեցին ինձ չարք,
Տարագիր հանին,
Տիրական գրկացն։
Րաբունւոյն բարւոյ,
Րախճական ձայնին
Րոտինս ոչ լուայ։
Ցանկութիւն չարեաց,
Ցանկալի դիմօք
Ցաւեցոյց զաչս իմ։
Իիւրաքանչիւրոց
Իիւսմամբ խուռն ախտից
Ւիւծեալ է հոգիս։
Փութացիր, անձն իմ,
Փախչիլ ի չարեաց,
Փափագիլ բարեաց։
Քեզ միշտ մերձ ծանիր
Քուն մահու եկեալ,
Քննող դատաւորն։