Գրաբարի դասագիրք/Վասն կոչեցելոց ի հարսանիսն գրաբար

Մանուկ Աբեղեան

37․ ՎԱՍՆ ԿՈՉԵՑԵԼՈՑ Ի ՀԱՐՍԱՆԻՍՆ (Մատթ․ ԻԲ․ 2-14)

²Նմանեցու արքայութիւն երկնից առն թագաւորի, որ արար հարսանիս որդւոյ իւրում։ ³Եւ առաքեաց զծառայս իւր կոչել զհրաւիրեալսն ի հարսանիս, և ոչ կամեցան գալ։ ⁴Դարձեալ առաքեաց այլ ծառայս և ասԷ․ «ԱսացԷ՛ք հրաւիրելոցն, ահաւասիկ զճաշ իմ պատրաստեցի, զուարարկք իմ և պարարակք զենեալք են, և ամենայն ինչ պատրաստ Է․ եկայք ի հարսանիս»։ ⁵Եւ նոքա յուլացեալ գնացին ոմն յագարակ իւր, և ոմն ի վաճառ իւր․ ⁶և այլք կալան զծառայս նորա, թշնամանեցին և սպանին։ ⁷Իսկ թագաւորն իբրև լուաւ՝ բարկացաւ, և առաքեաց զզօրս իւր և սատակեաց զսպանողսն զայնոսիկ և զքաղաքսն նոցա այրեաց։ ⁸Յայնժամ ասԷ ցծառայս իւր․ «Հարսանիքս պատրաստ են, և հրաւիրեալքն չԷին արժանի։ ⁹Արդ՝ երթա՛յք յանցս ճանապարհաց և զորս մի անգամ գտանիցԷք՝ կոչեցԷ՛ք ի հարսանիսս»։ ¹⁰Եւ ելեալ ծառայքն ի ճանապարհս՝ ժողովեցին զամենեսեան, զորս և գտին, զչարս և զբարիս․ և լցան հարսանիքն բազմականօք։ ¹¹Եւ մտեալ թագաւորն հայել զբազմականօքն՝ ետես անդ այր մի, որ ոչ Էր զգեցեալ հանդերձ հարսանեաց։ Եւ ասԷ ցնա․ ¹²«Ընկե՛ր, զիա՞րդ մտեր այսր, զի ոչ ունԷիր հանդերձ հարսանեաց»։ Եւ նա պապանձեցաւ։ ¹³Յայնժամ ասԷ թագաւորն ցսպասաւորն, «ԿապեցԷ՛ք զդորա զոտս և զձեռս և հանԷ՛ք զդա ի խաւարն արտաքին․ անդ եղիցի լալ և կրճել ատամանց․ ¹⁴զի բազումք են կոչեցեալք, և սակաւ են ընտրեալք»։