Դաշտերի վրա ցնծում է գարուն

Դաշտերի վրա ցնծում է գարուն

Իսահակ Իսահակյան


* * *


Դաշտերի վրա ցնծում է գարուն,
Արևը մաղում անձրև ոսկեբեր,
Ծաղիկը չքնաղ վառվում է, փթթում՝
Պայծառ, հուսավառ ժպիտով անմեռ...

Դաշտերի վրա լալիս է աշուն,
Անհամբույր, համառ, անավարտ անձրև,
Ծաղիկը տխուր մաշվում է, թոշնում՝
Ցրտահար, մռայլ, անհույս, անարև...

Իմ հոգու մեջ է ծաղիկը փթթում,
Իմ հոգու մեջ է ծաղիկը թոշնում...


1909