Էջ:Թումանյանի ԵԼԺ հ6.djvu/190

Այս էջը հաստատված է

 3. Ի՞նչ հիմքի վրա պիտի դրվի մասնակցող գրողների սեփականությունը դարձնելու հարցը։ Վարձատրությունը տողավարձո՞վ պիտի լինի թե ուրիշ ձևով, և որքա՞ն արձակին, որքա՞ն բանաստեղծությանը։

4. Խնդրում ենք անուններ տալ ու ընտրել Թիֆլիսի գրողներից չորս հոգի, որ իրենց վրա առնեն երկրորդ տպագրության հոգսը։ Պատասխանները պետք է գրել մինչև առաջիկա մայիսի սկիզբը հետևյալ հասցեով. Тифлис, Лермонтовская № 4, Лазарю Агаянц.

Խնդրում ենք մեր մյուս պարբերական թերթերին արտատպել այս նամակը։

Ղ. Աղայան
Հովհ. Թումանյան
Վ. Փափազյան[1])
ԲՈՂՈՔԻ ԴԵՄ

Պոլսի Բերայի ս. Երրորդության եկեղեցում միտինգ կազմելով մեր տաճկահայ եղբայրները բարձրացրել են իրենց եղբայրական ձայնը բողոքելու Կովկասում կատարվող բանտարկությունների համար, էս ամենը համարելով հալածանք հայ ցեղի դեմ։ Եվ մենք մնացել ենք ցավի մեջ։

Եվ ո՞րն է ցավը. էն, որ մենք, ռուսահայերս, այժմ շնորհակալ ու երախտապարտ լինելու փոխարեն ստիպված ենք էսպես պատասխանելու նրանց եղբայրական ցույցերին․

Պոլսահայ միտինգավոր եղբայրներ․ աղաչում ենք ազատեցեք մեզ ձեր եղբայրական զգացմունքների էդքան բուռն արտահայտություններից։ Դուք, անշուշտ, լսել եք, որ միտինգներ են անում ու բողոքում հայերի վրա կատարած բռնության դեմ, բայց էդ միտինգները լինում են ուրիշ երկրներում և բացառապես Տաճկաստանի դեմ, որ հալածում

  1. Ա. Ահարոնյանը չի ստորագրված բացակայության պատճառով։