և գործիքն անջատել էլեկտրացանցից)։
Էլեկտրառանդայով մշակում են փայտե իրերի մակերևույթները։ Ունի թմբուկների վրա ամրացված դանակներ, որոնք շարժման մեջ են դրվում արագընթաց կոլեկտորային էլեկտրաշարժիչով, և ռանդելու խորությունը կարգավորող մեխանիզմ։
Սկավառակային էլեկտրասղոցը գործածում են պողպատե սղոցասկավառակով փայտ սղոցելու համար։ Աշխատանքն ավարտելուց հետո սկավառակն ավտոմատորեն մեկուսացվում է։
Էլեկտրասրոցը նախատեսված է տնտեսական և խոհանոցային զանազան գործիքների ու պիտույքների, ինչպես նաև հյուսնային ու փականագործական-մոնտաժային Գ. սրելու համար։ Սրոցը կարող է օգտագործվել նաև ողորկման համար։ Զմռնիտե սկավառակները, գործվածքե, թաղիքե ողորկիչ սկավառակները տեղակայվում են ելքի երկու լիսեռներից մեկի վրա։
Էլեկտրասղոցակով փայտից, պլաստմասսայից և փափուկ մետաղից սղոցելով պատրաստում են զանազան իրեր։ Մշակվող իրի հաստությունը 15 մմ-ից չպետք է անցնի։
Ձեռքի ողորկիչ մեքենան կիրառվում է տնային գործածության զանազան իրերի մակերևույթները, հատակը, ավտոմոբիլի թափքը ողորկելու, ինչպես նաև հին ներկաշերտը հեռացնելու և մակերևույթը ներկման նախապատրաստելու համար։ Համեմատաբար կոպիտ նախնական ողորկման համար օգտագործում են տարբեր կոշտության հղկաթուղթ, իսկ վերջնամշակման համար նրբաթաղիք կամ գործվածք։ Ողորկման ժամանակ, ըստ անհրաժեշտության, կարելի է ավելացնել ողորկիչ մածուկ, կախույթ և այլ հղկանյութեր։
Սեղանի փայտամշակման հաստոցով փայտից և փափուկ այլ նյութերից պատրաստում են զանազան իրեր։ Հաստոցով կարելի է ֆրեզել վարակներ, տաշել դետալներ, գայլիկոնել անցքեր, ֆուգանել և կտրել տախտակեր։ Հաստոցը կարելի է օգտագործել նաև Գ. սրելու համար։
Ձեռքի էլեկտրագայլիկոնիչ մեքենան (էլեկտրագայլիկոնիչ) կիրառվում է մետաղե, փայտե և պլաստմասսայե իրերի, աղյուսի ու բետոնի մեջ անցքեր գայլիկոնելու ու լայնացնելու համար։ Գայլիկոնի կապիչը նախատեսված է տարբեր տրամագծի գայլիկոնների համար։
«Հմուտ ձեռքեր» լրակազմը համապիտանի (սրող, գայլիկոնող, հղկող և կտրող) հաստոց է։ Աշխատանքները կատարվում են լրակազմի մեջ մտնող դետալների և Գ-ի (ֆրեզ, հղկասկավառակ, ողորկիչ տափօղակ, դուր ևն) օգնությամբ։
ԳՈՒՆԱԵՐԱԺՇՏԱԿԱՆ ԿԱՅԱՆՔ (կամ կցուրդ), միացվում է ձայնավերարտադրիչ էլեկտրա– և ռադիոսարքերին (էլեկտրաերաժշտական գործիքներ, մագնիտոֆոն, էլեկտրոֆոն, ռադիոընդունիչ, հեռուստացույց), ունկնդիրների վրա երաժշտության հուզական ներգործության ուժեղացման համար երաժշտական ծրագիրը գունաշարժ խաղով լրացնելու եղանակով։ Կայանքը կարող է օգտագործվել նաև իբրև գունավոր լուսատու։ Բաղկացած է լուսաօպտիկական սարքվածքից և կառավարման էլեկտրոնային բլոկից։ Լուսաօպտիկական սարքվածքը գունավոր լամպեր (շարանով կամ միայնակ), գունավոր ապակիներով լուսարձակներ, կաթնասպիտակավուն ապակուց կամ պլեքսիգլասից (օրգապակի) զանազան էկրաններ են տափակ, գլանաձև, գնդաձև, բազմանիստ, հատակադիր, սեղանի կամ պատի (օրինակ, հատակադիր ջահի, սկահակի, որմնալամպի ձևով)։ Սովորաբար Գ. կ-ներում օգտագործվում է 3 գույն կարմիր, կանաչ և կապույտ, ավելի սակավ կիրառվում է չորս կամ ավելի գույն՝ կարմիր, կապույտ (մանուշակագույն), կանաչ, դեղին (նարնջագույն)։
Երաժշտությանն ուղեկցող գունաշարժ խաղը կայանքում ձեռք է բերվում հնչող մեղեդու բարձրությանը և տեմբրին համաժամ գունավոր լամպերի լուսարձակման պայծառության փոփոխությամբ։ Օրինակ, եթե երաժշտության մեջ գերակշռում են ցածր (բասային) տոները, ապա պայծառանում են կարմիր լամպերը առաջացնելով լարված մթնոլորտ, ունկնդիրների մեջ տագնապի զգացում։ Բարձր տոներն ուղեկցվում են կապույտ լամպերի լուսարձակմամբ ուժեղացնելով երաժշտության թափանցիկության, եթերայնության տպավորությունը։ Միջին տոնին համապատասխանող կանաչ գույնը գունաշարի հիմքն է և ունկնդիրների վրա հանգստացնող ազդեցություն է գործում առաջ բերելով վստահության, կայունության զգացում։
Բեմական ներկայացումներում, էստրադային համերգներում, դիսկոտեկներում և հանդիսային այլ միջոցառումներում օգտագործում են գունաբաժանումով Գ. կ-ներ. յուրաքանչյուր լամպ (կամ
