ևն): Անթույլատրելի է նաև գրառումով ժապավենը դնել ձայնական համակարգերի վրա և միկրոֆոնների մոտ, որովհետև վերարտադրելիս կառաջանա ուժգին աղմուկ։
ՄԱԳՆԻՏՈԼԱ, ընդհանուր պատյանի մեջ միավորված ռադիոընդունիչից և մագնիտոֆոնից բաղկացած համակցված սարք։ Մ. հնարավորություն է տալիս անմիջականորեն ձայնագրել ռադիոհադորդումները, ավելի թեթև է և ամփոփ, քան ռադիոընդունիչն ու մագնիտոֆոնը միասին վերցրած։ Մ. սնվում է ցանցից կամ մարտկոցից։ Տարբերում են դյուրակիր և ստացիոնար (սեղանի, հատակադիր) Մ-ներ։ Լայն տարածում են գտել ավտոմոբիլի Մ-ները։
ՄԱԳՆԻՏՈՌԱԴԻՈԼԱ, ռադիոընդունիչը, մագնիտոֆոնային կցուրդը և լազերային նվագարկիչը միավորող համակցված սարք կամ առանձին բլոկներից՝ թյուներից, լազերային նվագարկիչից, մագնիտոֆոնային կցուրդից, նախնական ուժեղարարից, էքվալայզերից (կապուղիների ամպլիտուդահաճախային բնութագրերի կարգավորման բլոկ), հզորության ուժեղարարից և ձայնական երկու համակարգերից բաղկացած համալիր (այսպես կոչված, ծավալահնչական համալիր)։ Մ. և ծավալահնչական համալիրը հնարավորություն են տալիս անմիջականորեն ձայնագրել ռադիոհաղորդումները, ձայնասկավառակից վերաձայնագրություն անել մագնիսական ժապավենի վրա, օգտագործել ընդհանուր հանգույցները (ձայնային հաճախությունների ուժեղարարը, փոփոխական հոսանքի ուղղիչը և ձայնական համակարգը)։ Մ. սնվում է փոփոխական հոսանքի ցանցից։ Երբեմն Մ. անվանում են երաժշտական կենտրոն:
ՄԱԳՆԻՏՈՖՈՆ, ձայնագրիչ, մագնիսական ժապավենի վրա ձայնի գրառման և վերարտադրման սարք։
Մ-ով կարելի է ձայնագրել միկրոֆոնով արտասանվող ելույթը, ռադիոընդունիչով կամ ռադիովերահաղորդման ցանցով տրվող հաղորդումը, հեռախոսային հաղորդագրությունը, վերաձայնագրել ձայնասկավառակից ևն։
Մ-ի հիմնական հանգույցներն են. մագնիսական գլխիկների (ջնջող, ձայնագրող և վերարտադրող) բլոկը, ձայնագրման և վերարտադրման ուժեղարարները, անդրաձայնային (գերձայնային) էլեկտրական տատանումների գեներատորը, ուղղիչը, ժապավենաձգիչ մեխանիզմը։ Անհրաժեշտ չափով ուժեղացված ձայնային հաճախության հոսանքը (միկրոֆոնից, ռադիոընդունիչից կամ այլ աղբյուրից) հասնում է ձայնագրող գլխիկին (հատուկ կառուցվածքի էլեկտրամագնիս), որը էլեկտրական տատանումներին համապատասխան մագնիսացնում է նրա աշխատանքային մակերևույթով սահող մագնիսական ժապավենը։ Ձայնի մագնիսական հետքը ժապավենի վրա (հնչյունագիր) կարող է երկար ժամանակ պահպանվել առանց փոփոխության։ Հնչյունագիրը վերարտադրելու ժամանակ մագնիսական ժապավենը վերարտադրող գլխիկին հպվելով, հարուցում է էլեկտրական տատանումներ, որոնք ճշգրտորեն կրկնում են գրառված տատանումները։ Այդ տատանումներն ուժեղացվում են վերարտադրման հատակ ուժեղարարի միջոցով և վերարտադրվում ձայնական համակարգով։
Ոչ պիտանի ձայնագրությունները ջնջելիս ժապավենն ապամագնիսացվում է ջնջող գլխիկի մագնիսական դաշտի ազդեցությամբ, որն ստեղծվում է հատուկ գեներատորից գլխիկին տրվող անդրադարձային տատանումներով։ Որպեսզի ձայնագրման ժամանակ հին ձայնագրությունը ջնջվի, ջնջող գլխիկը տեղակայվում է ձայնագրող գլխիկից առաջ և միացվում նրա հետ միաժամանակ։
Մ-ներում ձայնագրող և վերարտադրող գլխիկները հաճախ փոխարինվում են մեկ համապիտանի գլխիկով, որն, ըստ աշխատանքի բնույթի, կարող է միանալ մեկ կամ մյուս ուժեղարարին, ինչը, սակայն, բացառում է ձայնագրման ընթացքում ստուգիչ ունկնդրման հնարավորությունը։ Մ-ի հանգույցները և բլոկները սնվում են փոփոխական հոսանքի ցանցից Մ-ում եղած ուղղիչի միջոցով կամ հաստատուն հոսանքի ինքնուրույն աղբյուրից տարրից կան կուտակիչներից։ Թողարկում են նաև փոփոխական հոսանքի ցանցից (սնման բլոկի միջոցով) և հաստատուն հոսանքի ինքնուրույն աղբյուրից սնվող Մ-ներ։
Ժապավենագրիչ մեխանիզմը էլեկտրաշարժիչների, փոխանցիչների համակարգի, տանող և ուղղորդիչ հոլովակների, արգելակների և այլ հարմարանքների օգնությամբ ապահովում է ժապավենի սահուն մեկնարկը և հավասարաչափ շարժումը գլխիկների աշխատանքային մակերևույթով, ժապավենի անհրաժեշտ ձգվածությունը և կոճերի համաձայնեցված արգելակումը։ Ձայնագրության պահանջվող տեղը փնտրելիս ժապավենագրիչ մեխանիզմը կարող է ժապավենն արագացված (1-2 րոպեում) փաթաթել ուղիղ և հակառակ ուղղություններով։ Գլխիկների մաշումից խուսափելու համար փաթաթման ժամանակ ժապավենն ավտոմատորեն հեռանում է գլխիկից։
Մ-ներն ունեն ձայնագրման մակարդակի կարգավորիչներ և ցուցիչներ, ցանցի անջատիչներ, միկրոֆոնի և ձայնահանի միացման վարդակներ։ Բարդ կառուցվածքի Մ-ներում կիրառվում են ծավալահնչական տպավորություն ստեղծող բարձրորակ ձայնական համակարգեր (ներկառուցված կամ դուրս բերված), ինքնականգ, ժապավենի մետրաքանակի հաշվիչ, բարձր և ցածր հաճախությունների տեմբրի կարգավորիչներ, հեռակառավարման հարմարանք։
Կենցաղային Մ-ներում ձայնագրությունն արվում է երկու կամ չորս շավիղների
