Յակինթ, դահանակ գունով,
Սարդիոն, յասպիս լուսով,
Շափիւղայ, զըմրուխտ գեղով,
Տաճար լուսոյ մայր սուրբ կոյս:
Նըռնենեաց ծաղիկ պայծառ,
Պըտղոյն անմահին դու ծառ,
Ծընար զմիածինն անճառ,
Տաճար լուսոյ մայր սուրբ կոյս:
Շնորհօք սուրբ հոգոյն ամբիծ
Դա տախտակ աստուածագիծ,
Գուշակեալ մարգարէից,
Տաճար լուսոյ մայր սուրբ կոյս:
Ուրախ լիցաք մեք ի քեզ,
Ուղղութիւն սիրեաց ըզքեզ,
Կենաց հոտ բարեալ առ մեզ,
Տաճար լուսոյ մայր սուրբ կոյս:
Չըքնաղ վայելուչ մարմնով,
Լըցեալ մեծագին իւղով,
Զիս հաստատեսցես լուսով,
Տաճար լուսոյ մայր սուրբ կոյս:
Պապակիմ առ քեզ, յոգի,
Հոտ իւղոց ի քէն բուրի,
Հոգիս իմ խանդաղատի,
Տաճար լուսոյ մայր սուրբ կոյս: