ԿԱՄԱՎՈՐԸ ՈԻ ԹԻՖԹԻԿԸ
— Տը տը տը տը տը տը տը տը...
— Ինչ կըլլաս կոր Խիկար, ատ ի՞նչ եղեր ես, շապիկդ ո՞ւր է։
— Տը տը տը տը տը տը...
— Պատասխան չտա՛ս, բաղնի՞քը մոռցար շապիկդ։
— Չէ՛, չէ՛... տը տը տը.․․
— Ո՞ւր ձգեցիր ուրեմն։
— Տեղ մ՝ալ չձգեցի, տը տը տը...
— Ի՞նչ եղավ ուրեմն շապիկդ։
— Բռնությամբ վրայես քաշեցին հանեցին, առին գացին, տը տը տը...
— Չերքեզնե՞րը առին։
— Չէ՛, տը տը տը...
— Ո՞վ առավ։
— Տի տի տի կին մը... տը... տը... տը...
— Շապիկդ ձևավոր էր նե՝ թերևս վրան շապիկ ձևելու համար առած ըլլան։
— Չէ՛։
— Ի՞նչ ընելու համար առավ ուրեմն։
— Թիֆթիկ պիտի շինե եղեր, ու տիկիններուն քոմիթեն պիտի ղրկե եղեր, տը տը տը...
— Տիկիններուն քոմիթեն ո՞րն է, սա անցեալները Ասիո սովյալներու համար տիկիններե բաղկացյալ քոմիթե մը կազմվեցավ նե՝ ա՞ն է։
— Անանկ քոմիթե մը չեմ հիշեր կոր, աս ուրիշ է։
— Սա անցեալները քյուրտերը Հայաստանի գյուղերուն եկեղեցիները կողոպտեցին, որուն վրա հայ տիկիններե քոմիթե մը կազմվեցավ հիշյալ եկեղեցիներուն շուրջառ, շապիկ և ուրիշ լաթեղեն բաներ տալու նպատակավ նե՝ ա՞ն է։
— Ասանկ քոմիթե մը միտքս չգար կոր, աս ուրիշ է, ուրիշ։
— Հիվանդանոցի խղճալյաց օգնելու համար տիկիններե քոմիթե մը կա նե՝ ա՞ն է։
— Ասանկ քոմիթե մը լսած չունիմ, աս քոմիթեն ուրիշ քոմիթե է, ուրիշ։
— Օրթագյուղի աղջկանց վարժարանը գոցվելու վրա ըլլալով, ասոր առաջքն առնելու համար, աս օրերս տիկիններե բաղկացյալ քոմիթե մը կազմված է նե՝ ա՞ն է մի։
