Աբիսողոմ աղան ետևեն կանչեց զինքը և հարցուց.
— Չկրնա՞ր ըլլալ, որ գրքին ճակատը սպասավորներուս
ալ անունները դնես և իմացունես ազգին, որ Աբիսողոմ աղան
կովեր, ոչխարներ, էջեր և ագարակներ ունի յուր քաղաքին
մեջ։
— Ադ ձեր ըսածները հովվերգության ճյուղին կը վերաբերին։
— Չեմ հասկնար։
— Ատոնց վրա ոտանավորներ կը գրվին, եթե փափագիք
ոտանավոր մը շինեմ։
— Ի՛նչ ընեմ ոտանավորը։
— Լրագրի մը մեջ տպել կուտաք։
— Կը տպեն։
— Ինչո՛ւ չպիտի տպեն. եթե կես ոսկի տալու ըլլաք՝ քառասուն
անգամ կը տպեն։
— Շատ աղեկ, ադ ըսածդ գրե՛։
— Գլխուս վրա։
— Բայց աղվոր բան մը ըլլա։
— Շատ լավ։
— Այնպես որ տեսնողը հավնի։
— Հարկա՛վ։
— Վաղը առտու կը բերե՛ք։
— Վաղը առտո՞ւ... ի՞նչ կըսեք... մեկ ամիսեն հազիվ
կրնամ պատրաստել:
— Մե՞կ ամիսեն։
— Հազիվ, ոտանավոր կարդալը դյուրին է, բայց գրելը՝
դժվար: Գեղեցիկ ոտանավորի մը համար քիչեն քիչ երկու
ամիս պետք է։
— Ի՞նչ կըսեք...։
— Այո՛, բայց ես կաշխատիմ ամիսե մը լմնցնել։
— Ատ ի՞նչ դժվար բան է եղեր։
— Ի՛նչ կարծեցիք հապա, երկու ամիս պիտի սպասեմ,
որ մուսաս գա և ներշնչե ինձի, որպեսզի գրեմ, առանց մուսայի ոտանավոր չգրվիր:
— Եթե այդ մուսան գալու չըլլա՞...։