Արձագանք. — Դերձակ երեսփոխան մոր կը կրկնե ինչ որ ըսե այն երեսփոխանն, որուն երեք չորս ձեռք հագուստ կը ձևե և կը կարե տարին։
Արձան. — Տնկված մեծ մարդոց վրա կը բուսնի։
Արտևանունք. — Աչաց փեղկերը։
Բաղաձայն. — Աղքատություն, որ ինքն իրմե ձայն չկրնար հաներ։
Բաղանիք. — Քավարան մարմնո։
Բամբասանք. — Կանանց օրվան խնդիրը։
Բանալի. — Գողերուն քով ամեն տեսակը կը գտնվի։
Բանտ. — Դիվանագիտական փակագիծ։
Բարդություն. — Ամուսնություն բառերու։
Բարեբախտ. — Այն, որ չնախանձիր ուրիշներուն երջանկությանը։
Բարեգործություն. — Ռամկական բառ, որ գործածելի չէ։
Բարեկամություն. — Ինչ որ շատ դժվար է գտնել դժբախտության մեջ, որովհետև հարուստներն կը գտնեն զայն իրենց դրամին շնորհիվ։
Բարեկենդան. — Հիմարության շաբաթ։
Բարեպաշտ. — Այն, որ եկեղեցվո փսիաթներն համբուրելով կը մաշե և հետո կերթա որբերուն դրամն յուր կոկորդն անցունել։
Բարետոհմ. — Այն, որ շատ ոսկի ունի։
Բարձրաձայն. — Այն, որուն ձայնն բարձր հասակ մունի։
Բացակա. — Առաքինություն։
Բեռնակիր. — Այն, որ անտանելի կին մունի։
Բերան. — Ժամանակավ սրտին թարգմանն էր, հետո հրաժարեցուցին զինքն այն պաշտոնեն և շահու թարգման անվանեցին։
Բերդ. — Տգեղություն, որու շնորհիվ բազում կանայք կը պաշտպանեն իրենք զիրենք։
Բեվեռ. — Շաղկապ։
Բժիշկ. — Կալվածատեր մեր մարմիններու։
Գազան.— Բարի, անկեղծ ու սիրուն արարածներ, որ իրենց անոթության հագուրդ տալու նպատակավ միայն կը հարձակին երբեմն տկար էակներու վրա։
