ԱՌԵՎՏՐԱԿԱՆ
Հայհոյություն — Վերջին օրերս այս ապրանքեն շատ կա հրապարակը, այս ապրանքը թեպետ և գեշ, դարձյալ առնող կա, ծախողները երևելի ու ճանցված մարդիկ ըլլալնուն համար։
Խոսք — Ուզածիդ չափ կրնաս առնել և ծախել։
Ստախոսություն — Անպակաս է, իրարու ետևե միշտ գալու վրա է, եթե այսպես շարունակ գա, կը վախցվի, որ հրապարակը անոր ծանրութենեն փլչի...
Գործք — Քանի մը տարիներե իվեր այս ապրանքը կը պակսի, այնպես որ և ո՛չ մեկ վաճառական ունի այս ապրանքեն։
Զրպարտություն — Միշտ միևնույն վիճակի մեջ է։
Հոդվածներ — Պաղելու վրա են։
Օդերը — Շատ տաք են։
Կռիվներ — Օրըստօրե կը տաքնան և միշտ դեպի վեր կը բարձրանան։
Բարեգործություն — Մեր քաղքեն ասանկ ապրանք չելներ, դրսեն ալ եկած չունի։
Երիտասարդություն — Օրեօր թեթևնալու վրա է։
Սեր — Ասոր առևտուրը շատ զարմանալի է. բերկրությամբ գնողները տրտմությամբ կը ծախեն, տրտմությամբ գնողները բերկրությամբ կը ծախեն։
Աղջիկներ — Վրա ստակ տալով կրնան ծախվիլ. այս ապրանքեն ունեցողներուն վա՜յ գլխուն։
Խոսք հասկնալ — Մեր հրապարակին վրա աս անունով ապրանք չկա։
Ազգասիրություն — Ծախող շատ կա։
Փախուկ — Օրագիրը միայն ունի հատ մը։
Մետենիյեթ — Մանզումեն կը ծախեր, բայց հիմա անոր քովն ալ չմնաց։