— Հանդիսականները սուլել ըսել է։
— Անանկ է նե՝ ինչո՞ւ Վարդովյան էֆենտին չպատվիրեր յուր դերասանաց, որ հանդիսականները չծաղրեն։
— Հարկավ կը պատվիրե։
— Ի՞նչպես։
— Տուգանք առնելով։
— Ըսել է, որ դերասանները օր մը խոսք մեկ ընեն և քիչ մը ավելի տուգանք տալ որոշելու ըլլան նե՝ տեսարանին վրա մեկ երկու ժամ շարունակ պիտի խնդան։
— Ստակ տալեն ետքը ով կրնա խառնվիլ։
⁂
— Հայրիկ, ես ալ Այվազի պես լրագիր մը պիտի հրատարակեմ հասարակությունը կրթելու համար։
— Աղե՛կ, բայց Այվազի պես Մեղա մը պիտի կրնա՞ս գտնել, որ ան այ քեզի կրթե։
⁂
— Մարդ Աստուծո, ամեն գիշեր գինո՞վ պիտի գաս ասանկ։
— Դուն ալ ամեն գիշեր սա խոսքը պիտի ընե՞ս։
— Գինով մի՛ գար, որ չըսեմ։
— Մե ըսեր, որ գինով չգամ։
Տեսա՞ր ընթերցո՛ղ, մարդը հանցանք չունի եղեր, բոլոր հանցանքը կնկանն է, որ կը բարկացնե կոր իր էրիկը և գինով ըլլալուն պատճառ կ՝ըլլա կոր։
Ասոր սկզբնավորությունը ի՞նչպես է արդյոք։ Նախ էրիկը գինով գ ացեր է տե կնիկն ալ գինով ըսեր չէ նե՝ նախ կնիկը կեցած տեղը գինով ըսեր է տե էրիկն ալ բարկացեր ու խմել սկսեր է։
⁂
Ուրբաթ օրվան ձյունը պատմության մեջ մեծ տեղ մը պիտի գրավե։ Այնչափ առատությամբ և արագությամբ կ՝իջնար, որ ամենուն ալ մազերն ու պեխերը ճեփ ճերմակ եղած՝ ծերն երիտասար-
