ՈՉ — ԿԱԹՈՒՂԻԿԵ
Ֆրանսացիները Հայր Լորիգյոն ուհին։
Այս տարօրինակ մարդը, եռանդուն կրոնավոր հեղինակն է հանդուգն կերպով խեղաթյուրված ֆրանսական պատմության դասագրքի մը։ Բավական ատեն այս հերյուրված դասագրքին վրայեն կավանդվեր պատմության դասը կղերական վարժարաններու մեջ։ Մեր մեջ Հայր Լորիգյոները շատվոր են, ամբողջ միաբանություն մը կը ձևացնեն և Ադրիականի մեկ կղզյակին մեջ հաստատված՝ մեր եկեղեցական պատմությունը անդրալեռնական տոգորումներով սրբագրելու կաշխատին։
Առաջուց ի վեր չէի անգիտեր որ Մխիթարյան միաբանությունը իր բանասիրական հետազոտությանց քով կամ անոնցմե առաջ փրոփականտաչի մունջ դիտումներ ունի և լուռ իղձեր կը տածե։
Միայն գիտության սիրով վառված վանականներ չեն ասոնք, այլ ճարպիկ ու հաշվագետ մարդիկ որոնք պապականությունը տարածելու համար ազգային գրականության մեջ իրենց ստացած հեղինակությունը կը շահագործեն, և քիչ շատ հայ եկեղեցականի փակեղին նմանող իրենց գլխու ծածկույթին տակ փաթերայի գլխարկներ կը կրեն։
