— Իսկույն տուն կհասնենք, չքնես։ Դուք ո՞ր փողոցումն եք ապրում, պարոն Շահյան։
Շահյանը տվեց իրենց փողոցի անունը։
— Ո՜ւու,— բացականչեց Եվան,— ուրեմն դուք կիջնեք ճանապարհին։
— Ոչ. ինչպե՞ս կարելի է, օրիորդ. մինչև ձեր տուն ճանապարհ կդնեմ ձեզ, հետո ետ կդառնամ։
— Նեղություն չի՞ լինի ձեզ համար։
— Ի՞նչ նեղություն։
— Ուրեմն շնորհակալ կլինեմ։ Ո՜ւֆ, ինչպես խոնավ է օդը։ Սարեն, խո չե՞ս քնում։
— Ոչ,— պատասխանեց Սուրենը շալի տակից։
— Դուք եղբայր ունի՞ք, պարոն Շահյան։
— Երեք եղբայր ունեի։ Մեռան։ Երեքն էլ մի ամսում։
— Մի՜ ամսում... երեքն էլ,— արտասանեց Եվան սարսափած։— Այդ ի՞նչպես կարելի է։ Երևի կատակ եք անում, հա՞։
— Այստեղ ի՞նչ կա կատակ անելու։
— Երեքն էլ մի՜ ամսում, տե՛ր իմ աստված... Այդ սարսափելի է։ Դրանից խո գժվել կարելի է... Ինչի՞ց մեռան։
— Դիֆտերիտից։
— Ա՜խ, այդ դիֆտերի՜տը, այո դիֆտերի՜տը,— շշնջաց Եվան, ավելի ևս պինդ գրկելով փոքրիկ եղբորը։— Երևի փոքր էին, հա՞։
— Ամենից փոքրը երեք տարեկան էր, ամենից մեծը,— տասը տարեկան:
— Ա՜խ, խե՜ղճ, խե՜ղճ մանուկներ... Դուք սիրո՞ւմ էիք նրանց:
— Իբրև եղբայր, իհարկե, սիրում էի:
— Իսկ քույր... ունի՞ք:
— Մի քույր ունեի, նա էլ մեռավ:
— Նա էլ... Տե՛ր աստված... Դուք սարսափելի բաներ եք ասում... Երևակայում եմ, թե ինչքան դժբախտ պիտի լինիք դուք, չէ՞:
— Իհարկե, մեծ դժբախտություն է, երբ մարդ զրկվում է երեք...