Տեղի ետուն նենգաւորին,
Ըստ նշանի դրոշից նորին:
Գազանաբար յարձակէին
Վերայ զօրաց քրիստոնէին,
Իսկ նոքա ոչ թուլանային,
Այլ քաջութեամբ խիզախէին:
Ուժգին բախմամբ հարկանէին
Զմոխրատեսակ կեդարացին,
Մինչ անկելոցն ի հանդիսին
Դիաթաւալ խիտ խաղային:
Զաւուրս երիս անդ յամէին
Արիական զօրք Ֆռանգին:
Այլ՝ էր ի տօթ ժամանակին՝
Վարդավառի չորեքշաբթին,
Յորում քարինք շողանային,
Եւ կրականայր փոշի երկրին:
Սաղաւարտիւք և զրահիւք
Պարաւանդեալ անդամք նոցին:
Ի սաստկանալ տօթոյ ջերմին՝
Վառեալքն երկաթսն այրէին
Եւ յանջրդոջ տօթոյ տապին
Յոյժ ծարաւեալ պապակէին:
Քաջամարտիկքն թառամէին
Եւ ի ներքուստ ցամաքէին,
Մինչ թալկեալ ամէնևին
Եւ ի յուժոյ թողել բնաւին: