Այս խորհրդով կան և մնան
Նոքա ելից ժամանակեան,
Մինչ յաստուծոյ առցեն հրաման
Եւ երամով գան միաբան:
Այլ թէ վասն է՞ր այս գործեցան,
Որ քրիստոնեայք նուազեցան,
Այս է պատճառն յայդ յանդիման
Ի սուրբ գրոց վկայել բան:
Թէ ոչ կամի անմահ արքայն
Զիւր սիրելին՝ ամբարտաւան.
Յստակն ասաց սողոմոնեան.
«Ես եմ դիմակ այնպէս մարդկան»:
Վասն այսորիկ զքրիստոնեայն
Այլասեռիցն արար կոխան,
Զի հեզ բարուք ծառայական
Սուղ ինչ սգով աստէն ողբան,
Զի իրաւամբք արդարութեան
Անդէն առցեն զաստիս փոխան.
Ծոխ վայելել ուրախական,
Փայլեալ ի փառս անզուգական:
Եւ այլ պատճառ տեառն ցասման,
Որ հրաւիրակ պատժոց գտան,
Ծուխն մեղաց մեր բազմութեան,
Որ ի բարձունս բարդեցան:
