Ղօղեալ դողամ յայսոցն օդայնոց,
Որք գան ընդդէմ հոգոցն երկրայնոց,
Զի վասն անթիւ յանցանաց իմոց,
Սարսիմ սոսկամ յահէն դըժոխոց:
Տեսի զայս օրս և զարհուրեցայ,
Միտն իմ կորեաւ, ես յիմարեցայ,
Վա՜յ ինձ այսօր, որ մեղօք մեռայ,
Հուր գեհենին վասն իմ այժմ եռայ:
Ա՜յ իմ եղբարք, ինձ ողորմեցէք,
Զիմ աղաչանս այսօր լըսեցէք,
Վասն իմ առ տէր այժմ աղօթեցէք
Եւ խըղճալի գերայս օգնեցէք:
Սաստիկ հրամանըն արարչական
Այսօր էհաս ինձ անդարձական,
Մինչդեռ կայի անհոգ ի զբաղման,
Կըտրեաց ըզկապն իմ կենդանական:
Ահա մեռեալ և անշընչացայ
Եւ բանական մարդս անբանացայ,
Ծաղկալի ծառս այսօր չորացայ
Արմաւենիս ոստաքանցեցայ:
Րախութիւնս իմ արդ ըսպառեցաւ,
Կենաց աղբիւրն իմ ցամաքեցաւ,
Պարիսպ մարմնոյս այսօր խախտեցաւ,
Որմունքս անկան, շինուածքս փըլաւ:
