Բացվի՛ր, ի՛մ նազելի,
Տեսոյդ կարօտ եմ, կարօտ եմ.
Զարթի՛ր, ի՛մ աննըման,
Գեղոյդ կարօտ եմ, կարօտ եմ:
Գիշերն էանց, առաւօտն երևեցաւ,
Արևն ահա յարևելից մօտեցաւ,
Ցերեկոյէն ի վեր սրտիկս հալեցաւ.
Բացվի՛ր, ի՛մ նազելի,
Տեսւոյդ կարօտ եմ, կարօտ եմ.
Զարթի՛ր, ի՛մ աննըման,
Գեղոյդ կարօտ եմ, կարօտ եմ:
Գերի լինիմ քո ամէն մէկ տերևուն,
Քէնէ ի զատ ինձ ո՛չ այլ ինչ երևուն,
Չի՛ տար ինձ լոյս առանց քո՝ լոյսն արևուն.
Բացվի՛ր, ի՛մ նազելի,
Տեսոյդ կարօտ եմ, կարօտ եմ.
Զարթի՛ր, ի՛մ աննըման,
Գեղոյդ կարօտ եմ, կարօտ եմ:
Ես քո փըշովտ թէ բիւր անգամ հարկանիմ,
Ի քո սիրոյդ թէև ի հուր արկանիմ,
Զայն ամէնն ինձ անթիւ բարիք վարկանիմ.
Բացվի՛ր, ի՛մ նազելի,
Տեսոյդ կարօտ եմ, կարօտ եմ.
Զարթի՛ր, ի՛մ աննըման,
Գեղոյդ կարօտ եմ, կարօտ եմ:
