Սիրով քոյին ամենեքին,
Ի բազմազան տեղիս շըրջին,
Ո՜վ գեղափայլ քան ըզլուսին,
Յինէն վասն է՞ր ի բաց շրջիս:
Կայսերական ունիս պատկեր,
Յարեգական կոչումն ելեր,
Ի խղճոյս զինչ վնաս տեսեր.
Յինէն վասն է՞ր ի բաց շրջիս:
Ի քոյդ բաղձանս. ո՜վ աննըման,
Ծընունդք երկրի բևեռեալ կան,
Բազմաց լինիս ասպընջական.
Յինէն վասն է՞ր ի բաց շրջիս:
Ի յիմաստանոց փախչիլ փութաս,
Խոտորնակի առընթանաս
Յանարժանիցն ո՜չ հեռանաս.
Յինէն վասն է՞ր ի բաց շրջիս:
