Գերիս գերեալ գոռամ, գոչեմ,
Աղաղակեմ, լամ, հառաչեմ, ամա՜ն,
Կամիմ լինիլ, ահա ո՜չ եմ,
Այո՛, այո՛, այո՛, եղէ եղկելի, եղկելի:
Լինիմ, զոր ինչ ոչն կամիմ,
Թէպէտ կամիմ՝ զոր ո՛չ լինիմ, ամա՜ն,
Ահա այս է, որ կողկողիմ,
Այո՛, այո՛, այո՛, եղէ եղկելի, եղկելի:
Բանականն ընտրել ո՜չ անի,
Միջինն՝ ի վեր նայիլ չունի, աւա՜ղ,
Յետինն՝ ըզներհակն ընդունի,
Այո՛, այո՛, այո՛, եղէ եղկ՛ելի, եղկելի:
Կառավարն է յոյժ անգիտակ,
Խոտորի միշտ յաջ և յահեակ, աւա՜ղ,
Թողու զլծեալ ձիսն անսանձակ,
Այո՛, այո՛, այո՛, եղէ եղկելի, եղկելի:
Նաւուղիղն, որ նաւ ուղղիչ է,
Ի վայր անկեալ խոր կու նընջէ, ամա՜ն,
Քամին ներհակ կու հնչհնչէ,
Այո՛, այո՛, այո՛, եղէ եղկելի, եղկելի:
