Դիմեալս առ քեզ տաժանելիքս բողոքեմ արտասուելով,
Պատմեմ զանցանքս իմ ակամայ և օգնութիւն խնդրելով,
Ձախորդութեան հանդիպեցայ կերպիւ-կերպիւ փորձելով,
Փրկիչ, փրկեա ի փորձանաց, որ փրկողդ ես փորձութեանց:
Մատնեցայ ի բարեկամաց, որք ջատագով իմ էին.
Ուրախաթեամբ ի խրախճանս համարձակ մտանէին,
Պայծառ դէմօք զիս խաբէին և նենգութիւն խորհէին,
Փրկիչ, փրկեա ի փորձանաց, որ փրկողդ ես փորձութեանց:
Զրպարտեցայ իբրև շուշան, որ ի ծերոց ատենին,
Ժողովեցան մերձաւորքն իմ, այլ և այլ վկայէին,
Բաժակ մահու խոստանալով, կենաց զրկել կամէին,
Փրկիչ, փրկեա ի փորձանաց, որ փրկողդ ես փորձութեանց:
Լաւ է յայտնապէս թշնամին, քան զբարեկամ նենգաւոր,
Պարտ է փախչել բարեկամաց, որ ձևանայ կեղծաւոր,
Նա առաւել խածանէ զոք քան զօձն թիւնաւոր,
Փրկիչ, փրկեա ի փորձանաց, որ փրկողդ ես փորձութեանց:
