Ժիր այգեգործք եկեղեցեաց ազնըւականք,
Եւ համաշունչ վեհ բարեխօսք արդիւնականք,
Հոգաց մերոց հոգաբարձուք և օգնականք,
Զօրօք հըզօրք՝ տեսլեամբ ահեղք մերձ ազգականք:
Դուք անմոլար քաջ առաջնորդք մոլորելոց,
Եւ թագնաբար միշտ ձեռընտու սիրեցելոց,
Լուսաւորիչք մըթին մըտաց զըղջացելոց,
Եւ ջատագովք մերս փրկութեան ձեօք կըրթելոց:
Չարաբարոյ անօրինին մոլեգնական,
Կայծակնացայտ սուրք հոգեղէնք անվրիպական,
Զչարաճարտար զօրըս նորուն որք ի դարան,
Զայնս արարէք յողորմելեացս հալածական:
Յաւուր մեծի մահուան մերոյ սարսափելւոյ,
Երիւք միայն նըկանակօք պատրաստելու,
Ընդ այն հաճիլ զերթ լիաճաշ ճոխ սեղանոյ,
Այժմ աղաչեմք աղքատ երգօք թիւր բերանոյ: