Ա՜խ, վարդիկ, աւա՜ղ, վարդիկ,
Բոյս լուսաթերթիկ,
Կարմրափա՜յլ, արփիափա՜յլ
Տո՜ւնկ տիրակերտիկ:
Ողբալով, դեգերելով շրջիմ անդադար,
Ո՜չ կարեմ կեալ և ապրիլ ես այլազգաբար,
Սար ւ ի ձոր անկեալ յածիմ որպէս խելագար,
Ո՜չ երբէք ես գըտանեմ ինձ ճար և հընար.
Ա՜խ, վարդիկ, աւա՜ղ, վարդիկ,
Բոյս լուսաթերթիկ,
Կարմրափա՜յլ, արփիափա՜յլ
Տո՜ւնկ տիրակերտիկ:
Վառվառիլ և փայլփայլիլդ է՜, վա՜րդ, պատուական,
Ո՜չ է յոյժ երկարատև, այլ է՜ օրական,
Ո՜չ կարեմ պահել ըզքեզ գերիս լալական,
Եւ յայլուստ ո՜չ գըտանեմ ես ինձ օգնական.
Ա՜խ, վարդիկ, աւա՜ղ, վարդիկ,
Բոյս լուսաթերթիկ,
Կարմրափա՜յլ, արփիափա՜յլ
Տո՜ւնկ տիրակերտիկ:
Այգեպանն անիրաւի, որ մինչ վաղվաղղէ,
Զթերեբաց կոկոնըս քո՝ շուտ ի բաց քաղէ,
Ըզսրտիկս ի բաց հատեալ՝ արեամբ շաղախէ,
Եւ առեալ զիս՝ կենդանւոյն ի յերկիր թաղէ.
Ա՜խ, վարդիկ, աւա՜ղ, վարդիկ,
Բոյս լուսաթերթիկ,
