Օրիորդք
Օրիորդք
Արեգ սիրուն
Յերկնից կամար
Ծագէ զփայլուն
Նշոյլ պայծառ։
5
Զեփիւռն հընչէ,
Հողմիկ շընչէ,
Արօտք հոծ հոծ
Շարմեալ ճօճին,
Տերևք տընկոց
10
Խիստ տատանին։
Անդէն գետակ
Սրբայատակ
Փրփրազարդիկ,
Հոսմամբ սաստիկ,
15
Ահեղագոչ
Հանէ խոխոջ.
Պուէտ՝ Սոխակ,
Ի թուփս կանաչ
Յոյժ ներդաշնակ
20
Բառնայ զաւաչ։
Կաքաւն չքնաղ
Ի բլեր կատար
Հնչէ զկաղկաղ
Զիւր քաղցրարար:
25
Ահ՚ օրիորդք Հայկազնուհիք,
Գան կուռն ի կուռն բերկրալից,
Ըզգեղ բերեալք չքնաղագեղ
Յաւէրժ հարսանց անմահից:
Ժպիտ քաղցրիկ փայլին ի յայտս,
30
Այտքըն վառին յոյժ պայծառ
Հիւսակք վարսիցըն ծածանին
Առ ի թիկանց պերճափառ։
Դիտակս ունին հրեշտակուհեաց
Երկնակենցաղ, նազելի,
35
Ճակատս փայլուն, յօնս մրայօն,
Աչքունս սեաւ, թուխ, քաղցրալի:
Հասեալ նոցա հանդարտաքայլ
Յափունս ծաղկնայ վտակին,
Քաղցրախորժակ և սիրալիր
40
Վէպս զրուցից սկսէին:
Ոմն ի նոցունց փափկամարմին,
Տեսլեամբ գունեան-չքնաղիկ,
Բացեալ շրթունս ըզվարդագեղ
Զերգս յօրինէր ըզգողտրիկ։
45
Զիարղ անո՜յշ էր ձայնիկ այն,
Զիարդ ազդէ՜ր ի սրտիս.
Ես զմայլեալ անդր հայէի,
Վազէր, վառէր սուրբ սէր յիս....