Անվերնագիր (Հայնեյան մոտիվ)

Եղիշե Չարենց

[ 110 ]

ԱՆՎԵՐՆԱԳԻՐ
(Հայնեյան մոտիվ)

Այն սարոտ երկրում, քարքարոտ երկրում
Մենք գնում էինք ու երգեր երգում։—
Մեր ձեռին կարմիր, հուրհուրան դրոշ`
Մենք երգում էինք, որ գնանք գրոհ:

Ես երգո՛վ էի հպարտ, նա զենքով —
Ես պոետ էի, նա արի` զինկոմ:
Մենք գնում էինք՝ նստած չալ ձիեր.
Մեր շուրջը կռիվ, թշնամու դիեր,
Մեր դեմը ձմեռ, մեր դեմը արուն —

Ու ձմռան միջից ժպտացող գարուն...

Այն սարոտ երկրում, քարքարոտ երկրում
Մենք կռվում էինք ու երգեր երգում...
1929