Արցախյան գոյամարտի
սուրբ նահատակներին
Ձեր անունով ապրում ենք մենք,
ձեր անունով՝ տառապում,
Ձեր անունով ոտքի ելնում,
ձեր անունով՝ հասնում տուն։
Ձեր անունով ուժ ենք առնում,
ձեր անունով՝ հույս տալիս,
Ձեր անունով հուշ ենք մանում,
ձեր անունով՝ լույս տալիս։
Ձեր անունով երդվում ենք մենք,
ձեր անունով՝ մաքառում,
Ձեր անունով հաղթում ենք մենք,
ձեր անունով՝ վեր հառնում։
Ձեր անունով խոնարհվում ենք,
ձեր անունով՝ վեհանում,
Ձեր անունով ծոմ ենք պահում,
ձեր անունով՝ մեղմանում։
Ձեր անունով կնքում ենք մեզ,
ձեր անունով՝ մեզ կանչում,
Ձեր անունով թառամում ենք,
ձեր անունով՝ կանաչում։
Ձեր անունով կարոտում ենք,
ձեր անունով՝ տագնապում,
Ձեր անունով հավատում ենք,
ձեր անունով՝ մեզ չափում։
Ձեր անունով դարից ելնում,
ձեզ հետ նոր դար ենք մտնում,
Ձեր անունով բաժակ խփում,
ձեր անունով՝ մեզ գտնում։
Ձեր անունով մթնում ենք մենք,
ձեր անունով՝ լուսանում,
Ձեր անունով խոսում ենք մենք,
ձեր անունով՝ սուս անում։
Ձեր անունով խենթանում ենք,
ձեր անունով՝ կրակում,
Ձեր անունով երազում ենք,
ձեր անունով՝ ձեզ գրկում։
Ձեր անունով մեր սրտերը
սեւակնում են, դառնանում,
Ձեր անունով մեր շուրթերը՝
միանգամից քաղցրանում։
Ձեր անունով՝ մահը սուտ է,
Աստված վկա, դուք միշտ կաք։
Ձեր անունով մոմ ենք վառում
ու աղոթում, որ տուն գաք։
