Հ. և Թ. Տեր-Հակոբյանների հարսանիքի քսանհինգամեկին
Հ. և Թ. Տեր-Հակոբյանների հարսանիքի քսանհինգամեկին
Կես գիշեր է։ Լուռ սենեկում
Հանդարտ քայլով, փոքր-ինչ զբաղված,
Ման եմ գալիս. և անկյունում
Տեսնեմ՝ քնարս պատին կախած։
5
Տերևի պես դողդողալով,
Ես մոտեցա հին ընկերիս.
Խելքըս թռավ, բայց մեղմ ձայնով
Կանչեցի ես՝ ողջույն քնարիս։
Առա նորան և խնդացին
10
Փայփայելով՝ լավ մաքրեցի.
Կարծեմ, լարերը պակաս էին,
Բայց տակավին դեռ արծաթի։
Եվ արծաթի տարեդարձին
Այս տողերը ինձ հնչեցին։
15
Բախտավոր զույգ. որ մտաք աշխարհ
Սիրտ սրտի հետ և միաբան։
Սիրով գնացիք ձեր ճանապարհ,
Լուսապայծառ աստղի նման։
Որ մանկության առավոտից
20
Արդար վաստակ եք վաստակել.
Որ անտրտունջ այս աշխարհից
Երբեք աշխարհ չեք անիծել:
Սե՜ր գեղեցիկ, սե՜ր հոյակապ,
Ամեն տեղ քո շունչն եմ լսում.
25
Դու մարդկության հզոր շաղկապ,
Ամեն լավ բան դու ես ստեղծում։
Եվ այդ Ձեր սերն աստված օրհնեց,
Նայեց երկինք և հաշտ աչքով.
Թեթև, զեփյուռն Ձեզ ողջունեց,
30
Եռա՜ց և կյանք բոլոր շնորհով։
Արևելքի շողքը շողաց
Ադամանդի գոհարներով,
Շողաց և շաղը շողշողուն
Մարգարտափայլ կաթիլներով։
35
Շողաց և ծովըն ծիրանի
Երկու չքնաղ նավորդի հետ,
Մինը պսակյալ իսկ թագուհի,
Մյուսն անխոնջ ճարտարապետ։
Քա՜ջ նավորդներ, Ձեր գալն բարի.
40
Ձեզ գեղեցիկ պսակ արծաթի.
Ա՛յս օր հանդես ամուսնական,
Կեցցե՛ք, կեցցե՛ք այժմ և հավիտյան: